ကေသာကျော့ရှင်း
မူယာကင်းလို့
ဖြူစင်ဝင်းတဲ့ လမင်းနှယ်.....။
ပါးကွက် ပါးပါး
သနပ်ခါးနဲ့
နှုတ်ခမ်းဖူးလေး နီစွေးကြွယ်....။
ထမီ, ရင်ဖုံး
ဆံနွယ်ထုံးလို့
လုံလုံခြုံခြုံ လှလွန်းတယ်.....။
အမြင်လည်း...အေး
ရင်ထဲ...နွေးသမို့
ကျက်သရေ အပေါင်းနဲ့ ခညောင်းတယ်...။
ပန်းချီလည်း....ရှုံး
ရယ်(ရီ)လည်း....နှုန်းချိ
ရင်ထဲ...ထိလို့...
အမြတ်နိုးဆုံး ချစ်မိတယ်....။
(လင်းသထွန်း - LinnTha@gmail.com)ဧဒင်ဥယျာဉ် လင်းသထွန်းအိမ်သို့
Sunday, June 17, 2012
ငါ့အတွက်တော့ ချစ်နေဖို့ပဲလိုပါတယ်
မင်းရဲ့ငြင်းပယ်ခြင်း ဇာတ်လမ်းအစမှာ
ငါ့မျှော်လင့်ချက်တွေ ရပ်တန့်ခဲ့.......
တကယ်ဆို
ငါဟာ အလွမ်းတွေနဲ့ နေသားမကျသူပါ
အသည်းကွဲခြင်းနဲ့ အကျွမ်းဝင်မှု မရှိသူပါ ချစ်သူ....
မင်းနဲ့ နီးစပ်ဖို့ကြိုးစားမိတိုင်း
ငါ့ယုံကြည်ခြင်းတွေ အပိုင်းပိုင်း ချိုးဖျက်ခံခဲ့ရပေါ့....
အကျိုးမပေးဘူးလို့ဘဲ ပြောရမလား..?
ချစ်ခြင်းမှာ ကံမွဲလို့ ဒဏ်ရာတွေချည်းပဲ ဖြစ်တည်ခဲ့တယ်....
ဒါပေမယ့် ချစ်သူ
ဝေးကွာခြင်း အကြောင်းတရားဟာ ဘယ်လောက်ပဲ ခမ်းနား..ခမ်းနား
ငါ ရုန်းထွက်ဖို့ မကြိုးစားမိဘူး.....
အဲဒီလို မဆုံနိုင်ခြင်းတွေနဲ့
အချစ်မှာလုံးလုံးလျားလျားရှုံးနိမ့်ခဲ့ရပေါ့...
တကယ်တော့ အချစ်ရယ်
ဖြစ်တည်မှုနဲ့ ပြီးဆုံးမှုမှာ ချစ်ခြင်းကဏ္ဍ ကျရှုံးခဲ့ရပေမယ့်
ငါ့အတွေးတိုင်းမှာ မင်းရှိနေတာက
အရာရာထက်ပြီးပြည့်စုံခြင်းပါ.....
“ တကယ်ဆိုရင် ငါ့အတွက်တော့ ... ချစ်နေဖို့ပဲ လိုအပ်ပါတယ်ကွယ် ”
မုန်းပါ...မုန်းပါ ချစ်သူ.....
အလိုမတူဘဲ နှလုံးသားတစ်ခုလုံး အမုန်းခံခဲ့ရ
ဒီမျက်ဝန်းတွေက ငါ့ကို သတ်တာပါ....
ဒီအပြုံးတွေက ငါ့ကို ရက်စက်ခဲ့တာပါ...
မုန်းပါ....မုန်းပါ ချစ်သူ
မြတ်နိုးခြင်းမှာ သက်သေပြစရာ အလွမ်းတွေရှိလျက်နဲ့
ချစ်ခြင်းကို မင်းယုံကြည်အောင် အသက်မသွင်းနိုင်ခဲ့ဘူး....။
မုန်းပါ...မုန်းပါ ချစ်သူ
မြေနိမ့်ရာကို လှံစိုက်ခံရမှ ဒဏ်ရာက “လှ” သလားလို့ မမေးပါနဲ့တော့..။
ငါကတော့
ဒီအမုန်းတွေထဲ ချော်လဲ ရောထိုင်လိုက်ပါတော့မယ်...။
မုန်းပါ...မုန်းပါ ချစ်သူ
တန်ဖိုး မထားသူလို့ မသတ်မှတ်တော့ပါဘူး
တစ်ကိုယ်ကောင်းဆန်သူလို့ မစွပ်စွဲတော့ပါဘူး
ငါဘယ်လောက် ချစ်တယ်ဆိုတာ
နင်သိရင်....တော်ပြီ....။
ကဲ မုန်းပါ...မုန်းပါ ချစ်သူ
(လင်းသထွန်း - LinnTha@gmail.com)ဧဒင်ဥယျာဉ် လင်းသထွန်းအိမ်သို့
Subscribe to:
Posts (Atom)